رەسىملىك قورىمىلار

      ئۇرۇقلاش، ھازىرقى جەمئىيەتتىكى قىزىق تىمىلارنىڭ بىرى بولۇپ، تۇرمۇشتا نۇرغۇنلىغان ئۇرۇقلاش ئۇسۇللىرى بار؛ بەزىلەر چېنىقىش ئۆيلىرىگە بېرىپ چېنىقىدۇ، بەزىلەر پۇل تىجەش ئۈچۈن، تەبىئىي مۇھىتتا ئەركىن ھەرىكەت قىلىپ چېنىقىدۇ. لېكىن، مېنىڭچە يېمەكلىكنى تەڭشەش ئارقىلىق ئۇرۇقلاش تېخىمۇ ئىشەنچىلىك ھەم ئاددىي بولۇپ ھېسابلىنىدۇ. پۇرچاق ئۈندۈرمىسى، دەل ئۇرۇقلىتىش ئۈنۈمى ياخشى بولغان كۆكتاتلارنىڭ بىرى؛ ئۇنىڭ سۇ تەركىبى كۆپ، سۈيدۈك ھەيدەپ بەدەندىكى مايلارنى ئىرىتىش ئۈنۈمىگە ئىگە.

　　پۇرچاق ئۈندۈرمىسى بىلەن يىڭنىسىمان گۈمبەمەدەكنى ماسلاشتۇرۇپ ئىستېمال قىلساق، سەمىرىپ قالغان كىشىلەر توپىغا تولىمۇ ماس كىلىدۇ. پۇرچاق ئۈندۈرمىسى تەركىبىدە يىرىك تالا ماددىلىرى مول بولۇپ، بەدەنگە سۈمۈرۈلگەندىن كېيىن، ئۈچەينىڭ قىمىرلىشىنى تېزلىتىپ، بەدەندىكى ئارتۇق زەھەرلىك ماددىلارنى ۋە ئەخلەتلەرنى بەدەن سىرتىغا چىقىرىۋىتىدۇ ھەمدە بۇ ئارقىلىق بەدەندىكى مايلارنى ئىرىتىپ، يوغاق قورسىقىڭىزنى كىچىكلىتىدۇ.

　　كىتەرلىك ماتېرىيال: پۇرچاق ئۈندۈرمىسى(豆芽)، يىڭنىسىمان گۈمبەمەدەك(金针菇)، شىڭچوۋ جىياڭيۇسى(生抽)، لاۋچوۋ جىياڭيۇسى(老抽)، خاسىڭ مېيى(花生油)، تۇز

　　تەييارلاش ئۇسۇلى

　　بىرىنچى قەدەمدە: پۇرچاق ئۈندۈرمىسىنى پاكىزە يۇغاندىن كېيىن، سۈيىنى سارقىتىپ ئېلىپ قويىمىز. يىڭنىسىمان گۈمبەمەدەكنىڭ يىلتىز قىسىمىنى كىسىۋىتىپ، داسقا سېلىپ پاكىزە يۇغاندىن كېيىن، سۈيىنى سىقىۋىتىپ ئىشلىتىش ئۈچۈن ئېلىپ قويىمىز.

　　ئىككىنچى قەدەمدە: قازاننى ئېسىپ ماي قىزىتىپ، ئالدى بىلەن يىڭنىسىمان گۈمبەمەدەكنى سېلىپ قورۇپ، سەككىز ئۈلۈش پىشقاندىن كېيىن تەخسىگە ئۇسۇپ ئېلىپ قويۇپ تۇرىمىز.

　　ئۈچىنچى قەدەمدە: قازاننى چايقىۋىتىپ، قايتا قىزىتقاندىن كېيىن ماي قۇيمايلا ئاۋۋال پۇرچاق ئۈندۈرمىسىنى سېلىپ قورۇۋالىمىز.

　　تۆتىنچى قەدەمدە: پۇرچاق ئۈندۈرمىسى يۇمشىغاندىن كېيىن، يىڭنىسىمان گۈمبەمەدەكنى سېلىپ، ئارىلاشتۇرۇپ قورۇيمىز؛ كەينىدىن ئازراق سۇ ۋە خاسىڭ مېيى قوشىمىز. ئەگەر يىڭنىسىمان گۈمبەمەدەكنى قورۇغان ۋاقىتتا ماي ئاز بولۇپ قالغان بولسا، بۇ ۋاقىتتا ئازراق ئىستېمال مېيى قوشۇۋەتسەك بولىدۇ. ئاخىرىدا، شىڭچوۋ جىياڭيۇسى، لاۋچوۋ جىياڭيۇسى، تۇز قاتارلىقلارنى قوشۇپ رەڭ كىرگۈزگەن ۋە تەم تەڭشىگەندىن كېيىن ئۇسۇپ ئالساق بولىدۇ.