ئاچچىق چۈچۈك ياڭيۇ قەلەمچىسى، تەييارلاش ئۇسۇلى ئاسان، تەمى تېتىشلىق بولۇپ، قورساققا ئامراق كىشىلەر ھەر ۋاقىت ئۇنتۇپ قالمايدىغان بىر خىل قورىمىدۇر؛ مەيلى سىرتلاردا تاماقلانغان ۋاقىتتا بولسۇن ياكى ئۆيدە تاماق ئىتىپ يىگەندە بولسۇن، تەملىك قورۇلغان بىر تەخسە ياڭيۇ قەلەمچىسى كەم قالمايدۇ. ئاچچىق چۈچۈك ياڭيۇ قەلەمچىسىنى گەرچە ھەممەيلەن قۇرۇش ئۇسۇلىنى بىلسىمۇ، ئەمما قورۇش جەريانىدا يەنىلا بەزىبىر تاكتىكا ئۇسۇللارنى بىلىۋىلىش لازىم بولىدۇ، بۇنىڭدا قورۇغان ياڭيۇ قەلەمچىسى تېخىمۇ تەملىك چىقىدۇ.

       خام ماتىريال: بەرەنگە2 دانە 700گىرام، كوك-قىزىل مۇچ يېرىم تالدىن جەمئىي 50 گىرام، قاقمۇچ 3 گىرام، سۇماي 120 گىرام، غولپىياز 20 گىرام، سامساق 20گىرام، زەنجىۋىل 10گىرام

　　تەم خۇرۇچلىرى: تۇز 6 گىرام؛ ئاق ئاچچىقسۇ 10 گىرام، كاۋاۋىچىن 4گىرام، شېكەر 5 گىرام، تېتىقۇ 3 گىرام، توخۇ تەم جەۋھىرى 3 گىرام، قىزىلمۇچ يېغى 12 گىرام

       تەييارلاش ئۇسۇلى: بەرەنگىنى پاكىز ئادالاپ سەرەڭگە تېلىدەك تەكشى توغراپ سۇغا چىلاپ قۇيىمىز، كوكمۇچ، قىزىلمۇچنىمۇ ئىنچىكە توغراپ، غولپىياز، سامساق، زەنجىۋىل قاتارلىقلارنى ئۇششاق توغراپ تەييارلىۋالىمىز.

　　توغرالغان بەرەنگىنى3 قېتىم يۇيۇۋەتكەندىن كېيىن، قازانغا سۇ قۇيۇپ بەرەنگىنى سېلىپ قاينىتىپ چالا پىشۇرۇپ سۈزىۋالىمىز.

　　قورۇش ئۇسۇلى: قازانغا ماي قۇيۇپ ماي قىزىغاندا غولپىياز، سامساق،زەنجىۋىل، كاۋاۋىچىن، قاقمۇچنى سېلىپ قۇرۇپ تەييارلانغان بەرەنگە، كوكمۇچ، قىزىلمۇچنىمۇ سېلىپ قورۇيمىز؛ كەينىدىن مۇۋاپىق مىقداردا تۇز، شېكەر، تېتىتقۇ، توخۇ تەم جەۋھىرى سېلىپ تەم تەڭشەپ، ئازراق سۇقۇيۇپ پىشقاندا تەمىنى تېتىپ ئازراق ئاق ئاچچقسۇ ۋە قىزىلمۇچ مېيى قۇيۇپ ئارىلاشتۇرۇۋەتكەندىن كېيىن تەخسىگە ئۇسسۇپ ئىستېمال قىلساق بولىدۇ.

　　ئالاھىدىلىكى: بەرەنگە تۆۋەن ئېنىرگىيەلىك، كۆپ خىل ۋىتامىنلىق بولغان، مىكرو ئىلمىنتلار تەركىبى يۇقىرى بولغان يېمەكلىك بولۇپ، ئەڭ كۆڭۈلدىكىدەك ئۇرۇقلاش يېمەكلىكى بولۇپ ھېسابلىنىدۇ؛ ھەر 100گىرام بەرەنگىنىڭ تەركىبىدىكى كالىينىڭ مىقدارى، 300 مىكرو گىرامغا يېتىدۇ. مۇتەخەسسىسلەرنىڭ قارىشىچە، ھەر ھەپتىدە 6-5 بەرەڭگە ئىستېمال قىلىپ بەرسەك، سەكتە كېسەللىكىگە گىرىپتار بولۇش نىسبىتىنى %40 تۆۋەنلەتكىلى بولىدىكەن. بۇنىڭ بىلەن بىرگە، بەرەنگىنىڭ يەنە ھەزىم قىلىش ناچار بولۇش، ئادەتلىنىش خاراكتېرلىك قەۋزىيەت، ماغدۇرسىز ھېس قىلىش، ئاستا خاراكتېرلىك ئاشقازان ئاغرىش، بوغۇم ئاغرىش، تېرە ھۆل تەمرەتكە قاتارلىق كېسەللىكلەرنى داۋالاشتىكى قوشۇمچە رولغا ئىگە. بۇندىن باشقا، بەرەنگىنىڭ يەنە قاننىڭ قەنت ۋە ماي مىقدارىنى تۆۋەنلىتىش، ھۆسىن گۈزەللەشتۈرۈش، قېرىشقا قارشى تۇرۇش قاتارلىق ئۈنۈملىرىمۇ بار.