توي تۇرمۇشى ئەزەلدىن ئاسانغا توختايدىغان ئەمەس بولۇپ، ئۇن، ياغ، گۈرۈچ دىگەنلەرگە ئوخشاش كۈندىلىك تۇرمۇشقا ئائىت ھەر تۈرلۈك كىچىك ئىشلاردىن باشقا، يەنە ھەرخىل مۇرەككەپ ئىجتىمائى مۇناسىۋەتلەرنى بىتەرەپ قىلىشقا توغرا كىلىدۇ؛ بۇلارنىڭ ئىچىدە، پەقەت ئەر-خوتۇنلۇق مۇناسىۋىتىنى ياخشى ساقلاشنىڭ ئۆزىلا، ئاسانغا توختىمايدىغان بىر ئىش. ئۇنىڭ ئۈستىگە، توي تۇرمۇشىنى ئىزچىل تۈردە ئىجىل-ئىناق ھالەتتە ساقلاپ ئۆتۈش، ئەقىل پاراسەتكە ئىھتىياجلىق بولۇپ، دىققەت قىلىشقا تىگىشلىك تەرەپلەر ئىنتايىن كۆپ.
    نۇرغۇن ئاياللار ھەمىشە ئۆزىنىڭ ئېغىزىنى باشقۇرالمايدىغان بولۇپ، ئېغىزىغا نىمە كەلسە شۇنى دەيدۇ؛ ئەسلىدە مۇناسىۋىتى ياخشى ئەمەس كىتىپ بارغان ئىككەيلەن، كۆپىنچە بەزىبىر بولمىغۇر گەپلەرنى قىلىشىپ، مۇناسىۋەتكە تەسىر يەتكۈزىدىغان ئەھۋاللارنى كەلتۈرۈپ چىقىرىدۇ. ئاياللار شۇنى چۈشىنىپ يىتىشى كىرەككى، ئەر-خوتۇنلار مۇناسىۋىتى ھەرقانچە ياخشى بولسىمۇ، ھەمىشە تۆۋەندىكى پاراڭ تېمىلىرىغا ئېسلىۋىلىشتىن ساقلىنىشى لازىم؛ بولمىغاندا، ئوتتۇرلۇقتىكى مىھرى-مۇھەببەت بارغانسىرى سۇسلىشىپ بارىدۇ.

ئىلگىرىكى مۇھەببەت تارىخىنى سۆزلەشمەسلىك
    ھاياتىدا پەقەت بىرلا قېتىم مۇھەببەتلىشىپ توي تۇرمۇشىغا قەدەم قويىدىغانلار ئىنتايىن ئاز؛ شۇڭلاشقا، بىر ئىككى قېتىملىق مەغلۇبىيەت بىلەن ئاخىرلاشقان مۇھەببەت تارىخى بار بولۇش، ئىنتايىن نورمال بىر ئىش. بىراق، نىمە بولۇشىدىن قەتئىنەزەر، ھازىر توي تۇرمۇشىغا قەدەم قويغان بولغاندىكىن، ئۆتكەنكى ئىشلارنى ئۇنتۇپ، ئۇنى قايتىدىن كۆتۈرۈپ چىقماسلىق كىرەك.
    لىكىن، بەزى ئاياللار بۇ نوقتىنى چۈشەنمەي، ئىرىنىڭ ئۆزىگە بولغان ئامراقلىقىغا تەمەننا قىلىپ، ھەمىشە ئۆزىنىڭ ئىلگىرىكى مۇھەببەت تارىخىنى خالىغانچە تىلغا ئېلىپ قوپىدۇ. بىراق بۇنداق قىلمىش، ئىرىڭىزدە سىزنى ئىلگىرىكى مۇھەببىتىنى ئۇنتۇپ كىتەلمەپتۇ دىگەن قاراشنى پەيدا قىلىپ قويىدىغان بولۇپ، قېتىم سانى كۆپەيگەنسىرى، ئىرىڭىزنىڭ كۆڭلىدە سىزگە قارىتا پىكىر پەيدا بولۇپ، مۇناسىۋىتىڭلارغا ئېغىر دەرىجىدە تەسىر يەتكۈزىدۇ. شۇنىڭ ئۈچۈن، ئەقىللىق ئاياللار ئىلگىرىكى ۋاقىت تارىخىنى كۆڭۈل قېتىدا قولۇپلاپ ساقلاپ، كۆز ئالدىدىكى ئادەمنى قەدىرلەشنى بىلىدۇ.

ھەمىشە پۇل ئۈچۈن جىدەل قىلىشتىن ساقلىنىش
    ئەر-خوتۇنلار ئوتتۇرسىدا پۇلنى تىلغا ئالماي بولمايدۇ، چۈنكى تۇرمۇش كەچۈرۈشتە پۇل بولمىسا بولمايدۇ؛ ئەمما ھەمىشە پۇلنى تىلغا ئېلىۋىلىشقىمۇ بولمايدۇ، بولمىغاندا ئەر-خوتۇنلار ئوتتۇرسىدا ئارىلىق شەكىللىنىپ قالىدۇ.
    ئىككەيلەن توي قىلىپ بىر ئۆيگە كىرگەن ئىكەن، بارلىق پۇل ۋە مال-مۈلۈك ئىككەيلەنگە ئورتاق بولىدۇ؛ ئەگەر يەنە ئىنچىكە ھىساب قىلىپ، سىنىڭكى ۋە مىنىڭكى دەپ ئايرىيمەن دىسەك ھەمدە ھەمىشە پۇل مەسىلىسى قىلىپ جىدەل چىقارساق، ئۇنداقتا خاتىرجەم كۈن ئۆتكۈزۈش ئاساسەن مۇمكىن بولمايدۇ. بۇنداق جىدەللىشىدىغانغا ئارتۇق زىھنى ۋە ۋاقتىنى سەرپ قىلغاندىن، ئەر-خوتۇن ئىككەيلەن بىر-بىرىنى قەدىرلەپ كۆپرەك پۇل تېپىشقا تىرىشقان ئەۋزەلدۇر.

ھەمىشە قارشى تەرەپنىڭ يىتەرسىزلىكلىرىنى تىلغا ئېلىپ ئەيىبلەشكە ئادەتلىنىپ قالماسلىق
    بىر ئايال كىشى ئەگەر ئەر كىشىنى ئۆزى ئويلىغاندەك ئىش كۆرسۇن دىسە، بۇنىڭ ئەڭ ياخشى ئۇسۇلى ئەيىبلەش ئەمەس بەلكى ماختاش؛ ئۇنىڭ ئۈستىگە، ھەرقانداق ئادەمنىڭ ئازدۇر-كۆپتۇر كەمچىلىك يىتەرسىزلىكى بار بولىدۇ. ئەر-خوتۇنلار ئوتتۇرسىدا، بىر-بىرىنى توغرا چۈشىنىپ ۋە بىر-بىرىگە كەڭ قوساقلىق بىلەن مۇئامىلە قىلىپ ئۆتسە، بۇنداق مۇناسىۋەت ئاندىن ئۇزۇنغىچە داۋاملىشالايدۇ.
    ئىككەيلەن بىرگە تۇرمۇش كەچۈرۈش جەريانىدا، قارشى تەرەپنىڭ ئارتۇقچىلىقىنى بايقاشقا ماھىر بولۇپ، قارشى تەرەپنى كۆپرەك ماختاپ بىرىشى، كۆڭۈلنى خۇشال قىلىدىغان ئىشلار توغرىسىدا پاراڭلىشىپ، ھەمىشە قارشى تەرەپنىڭ ئەيىب نوقسانلىرىنى ئېغىزىدىن چۈشۈرمەي يۈرۈشتىن ساقلىنىشى لازىم. بولمىغاندا، قارشى تەرەپ سىزنى ھەرقانچە ياخشى كۆرسىمۇ، سىزنىڭ ئىنكار قىلىشىڭىز ۋە ئەيىبلىشىڭىز سەۋەپلىك سىزدىن بارغانسىرى يېراقلاپ كىتىدۇ.
ئاخىرقى سۆز
    ئەر-خوتۇنلۇق مۇناسىۋىتىنى ئىزچىل تۈردە ئىجىل-ئىناق ساقلاپ ئۆتۈش ئاسان ئەمەس، شۇڭا توي قىلىپ بولدۇم دەپ بوشىشىپ كىتىشكە بولمايدۇ؛ ئەكسىچە، كاللىنى تېخىمۇ ئىشلىتىپ، مۇناسىۋەتنى كۆڭۈل قويۇپ تەرەققى قىلدۇرغاندا، ئاندىن ئۆمۈرنىڭ ئاخىرغىچە قول تۇتۇشۇپ بەخىتلىك ھالدا ئۆتۈش مۇمكىن بولىدۇ.