ياز كۈنلىرى مىۋە-چىۋىلەر مول بولىدىغان كۈن، ھەممە ئادەم كۈندىلىك تۇرمۇشىدا مىۋە-چىۋىلەردىن ئايرىلالمايدۇ. ئەمما يازنىڭ بۇ ئىسسىق كۈنىلىرىدە بەزىدە مىۋىلەر بۇزۇلۇپ قالىدىغان ئەھۋاللارغا دۇچ كىلىمىز؛ ئۇنداقتا بۇزۇلۇپ قالغان مىۋىلەرنى زادى يىيىشكە بولامدۇ يوق؟

   ئالدى بىلەن مىۋىنىڭ قانداق بۇزۇلۇپ قالغىنىغا قارايمىز.

   قاتتىق تىگىشىشتىن بۇزۇلغان مىۋىلەرنى يىيىشكە بولىدۇ. قاتتىق تىگىشىش مىۋىلەرنىڭ يۈزىدىكى ھۈجەيرىلەرنى زەخمىگە ئۇچرىتىدىغان بولۇپ، مىۋە تەركىبىدىكى بەزىبىر ئەسلىدە رەڭسىز كەلگەن ماددىلار قېنىق رەڭگە ئۆزگىرىپ، قاتتىق تىگىشىشتىن زەخمىلەنگەن قىسىم قارىداپ قالىدۇ. شۇنىڭ ئۈچۈن پەقەت قاتتىق تىگىشىپ زەخمىلەنگەندىن كىيىن قىسقا ۋاقىت ئىچىدە يەپ بولساق، بۇ خىلدىكى "بۇزۇلغان" مىۋە-چىۋىلەر سالامەتلىككە زىيان قىلمايدۇ.

   توڭلىتىشتىن زەخمىلەنگەن مىۋىلەرنى يىيشكە بۇلىدۇ. توڭلاتقاندىن كىيىن، مىۋىلەر ئوخشاشلا ھۈجەيرىلەر زەخمىگە ئۇچرىغانلىق سەۋەبىدىن، سىرتقى كۈرنىشى ئاز-تولا كۆرۈمسىز بولۇپ قالىدۇ، ئەمما تەركىبىدە باكتىرىيە كۆپىيىۋالغان ئەمەس. شۇنىڭ ئۈچۈن بۇ خىلدىكى زەخمىگە ئۇچرىغان مىۋە-چىۋىلەرمۇ بىخەتەر ھىسابلىنىدۇ.

   كۆكىرىپ بوزۇلۇپ قالغان مىۋىلەرنى يىيىشكە بولمايدۇ، دەرھال تاشلىۋىتىش كىرەك. كۆكەرتكۈچى زەمبۇرۇغلارنىڭ ھاياتلىق كۈچى ئويلىغىنىمىزدىن كۆپ كۈچلۈك بولۇپ، كۆكىرىپ قالغان مىۋىلەرنىڭ كۆكىرىپ قالمىغان قىسىملىرىمۇ كۆكەرتكۈچى زەمبۇرۇغ تەرپىدىن بۇلغانغان بولۇشى مۇمكىن. شۇڭا بۇ خىلدىكى بۇزۇلۇپ قالغان مىۋىلەرنى ئىككىلەنمەستىن تاشلىۋىتىش كىرەك، ئازراقمۇ يىيىشكە بولمايدۇ.

   ئەلۋەتتە، ئەگەر مىۋىنىڭ قانداق بۇزۇلۇپ قالغىنىغا ھۆكۈم قىلىشقا بولمىغاندا، ئەڭ ياخشىسى يىمەسلىكىڭىز كىرەك، بولمىغاندا تاساددىبى قورسىقىڭىز ئاغرىپ قالسا، بىئارام بولدىغىنى يەنىلا ئۆزىڭىزدۇر.