ئۇزاق مەزگىللىك كۆزىتىشىمىز ۋە تەتقىقاتلاردىن قارىغاندا، ھەر قانداق بىر ئەرنىڭ گۈزەللىككە بولغان ئىنتىلىشچانلىقى ئاياللارغا قارىغاندا نەچچە ھەسسە كۈچلۈك بولىدىغانلىقى مەلۇم بولغان. بولۇپمۇ دۆلىتىمىزدە ئىسلاھات ۋە ئىشىكنى سىرتقا ئېچىۋېتىش سىياسىتى يولغا قويۇلۇپ، ئىنسان تەبىئىي ساغلام گەۋدىلىنىۋاتقان بۈگۈنكى كۈندە، خېلى كۆپ بىر قىسىم ئەرلەرمۇ ئۆز قەلبىدىكى گۈزەللىك تۇيغۇلىرىنى دادىللىق بىلەن بايقاپ، ئۇنى مۇۋاپىق ئۇسۇل بىلەن ئىپادىلەش ئۈچۈن ئىزدەنمەكتە. شۇنداقتىمۇ ئەرلەر يەنىلا ئۆز قەلبىدىكى بۇ خىل گۈزەل تۇيغۇلىرىنى ناھايىتى ئەپچىللىك بىلەن ئىپادىلەشنى ۋە يوشۇرۇشنى بىلىدۇ. يەنە بىر نوقتىدىن ئىيىتقاندا، ئەرلەرنىڭ گۈزەللىككە بولغان ئىنتىلىشى كونكرىت، ئەمەلىي بولۇپ، كۆپ ھاللاردا بىر خىل قىياپەت، بىرەر ئادەم ياكى بىرەر شەيئىگە مەركەزلەشكەن بولىدۇ. مېنىڭچە چىرايلىق ئاياللارنى كۆرگەندە پەرۋاسىز ھالدا ھاياجانلانماي تۇرالايدىغان بىرمۇ ئەر بولمىسا كېرەك. ئاياللار، بولۇپمۇ، چىرايلىق ۋە قاملاشقان ئاياللار توغرىسىدا ھەر خىل خىيالىي ۋە كونكرىت پاراڭلارنى قىلىش، ئەرلەرگە تولا چاغلاردا تەسۋىرلىگۈسىز خۇشالللىق ئاتا قىلىدۇ. شۇنىڭ ئۈچۈن، بىر نەچچە ئەر بىر يەرگە جەم بولغاندا ئۇلارنىڭ قىلىشىدىغىنى، يەنىلا ئاياللار توغرىسىدىكى قىزىقارلىق پاراڭلار بولۇپ، ئۇلار ئاياللارنىڭ ئۆزىگە خاس قىياپەتلىرى، مىجەز-خۇلقلىرى توغرىسىدا ھەر خىل پاراڭلارنى قىلىشنى بەكمۇ ياخشى كۆرىدۇ. ھەتتا، بۇنداق چاغلاردا ئۆزى ياخشى كۆرىدىغان ئاياللارنىڭ ئەيىبىنى قەستەن ئېچىپ تۇرۇپ پارىڭىنى قىلىشمۇ ئەرلەر ئۈچۈن ھېچقانچە ئىش ئەمەس. ئۇلار مانا مۇشۇ خىلدىكى ئۇسۇللار ئارقىلىق ئۆزلىرىنىڭ گۈزەللىككە بولغان كۈچلۈك تەلپۈنۈشلىرىنى ئىپادىلىشىدۇ. بۇنداق پاراڭلار ئەرلەرنىڭ ئەرلىك جاسارىتىنى ئاشۇرۇپلا قالماستىن، يەنە تېخى ئەرلەرنىڭ تۇرمۇشنى سۆيۈش، ھاياتلىقنى قەدىرلەشتىن ئىبارەت گۈزەل ۋە جۇشقۇن روھىي ھالىتىنى ئىپادىلەپ بېرىدۇ. مانا بۇ ئەرلەرنىڭ روھىي جەھەتتىن گۈزەللىككە ئىنتىلىشنىڭ سىرتقى ئىپادىسى.

ئەرلەر سىرتقى قىياپەت جەھەتتىنمۇ گۈزەللىككە ئىنتىلەمدۇ؟

 ئەرلەرنىڭ سىرتقى قىياپەت جەھەتتىن گۈزەللىككە بولغان ئىنتىلىشى مەلۇم جەھەتتىن گەرچە ئاياللاردىن قېلىشمىسىمۇ، بىراق، ئەرلەر ئۇنى ئاياللارغا قارىغاندا خېلىلا ئەپچىل ئۇسۇلدا نىقابلىيالايدۇ. ئەرلەر گەرچە ئاياللاردەك ھەر خىل پاسوندا كىيىنىشنى، ھەر خىل قىياپەتتە ياسىنىشنى ئوتتەك ئارزۇ قىلسىمۇ، بىراق ئۇلارنىڭ كىچىكىدسىن تارتىپ ئالغان گۈزەللىك تەربىيەسى ۋە ئىجدىمائىي مۇھىتنىڭ تەسىرى ئۇلارنى ئۆز كۆڭۈللىرىدىكى بۇ خىل كۈچلۈك ئارزۇنى زور كۈچ بىلەن كونترول قىلىپ ياشاشقا مەجبۇر قىلىدۇ-دە، نەتىجىدە ئەرلەر كۆڭۈللىرىدىكى گۈزەللىككە بولغان ئىستەكلىرىنى، گۈزەل ئاياللارغا تەلپۈنۈش، پاكىز كىيىنىپ يۈرۈش، پاكىز قىز-چوكانلارغا ۋە گۈزەل بولغانلىكى ھەر قانداق شەيئىگە زوقلىنىپ تۇرۇپ باھا بېرىش قاتارلىق ئۇسۇللار بىلەن ئىپادىلەشكە مەجىبۇر بولۇش بىلەن بىر ۋاقىتتا، يەنە گۈزەللىككە بولغان ئاشۇ ئىنتىلىشلىرىنى مۇۋاپىق ئۇسۇلدا سىرتقى جەھەتتىن ئىپادىلەشكىمۇ تىرشىدۇ-دە، مۇشۇ ئۇسۇل ئارقىلىق كۆڭۈل ئارزۇلىرىغا تەسەللىي بېرىشىدۇ. چۈنكى، نورمال بولغان ھەر قانداق بىر ئەرنڭ چوڭ ياشلىقلىرى كۈنىگە بىر قانچە قېتىم يۈزلىرىنى يۇيۇش، ساقال-بۇرتلىرىنى چرايلىق ياسىتىۋېلىشنى، پاكىز، ئاپئاق كۆينەكلەرنى كىيىشنى بىر خىل گۈزەللىك ۋە مەدەنىيەت دەپ بىلىشسە، ياش يىگىتلەر ئاياقلىرنى كۈندە بىر نەچچە قېتىم تازىلاپ ۋە مايلاپ يۈرۈشنى، چاچلىرىنى رەتلىك-چىرايلىق تارىۋېلىشنى، ھەر خىل يېڭى پاسوندىكى كىيىملەرنى كىيىشنى، بىر خىل گۈزەللىك دەپ بېلىشىدۇ-دە، ئۇلار ئۆزلىرىنىڭ سىرتقى قىياپەت گۈزەللىككە بولغان ئىنتىلىشچانلىقىنى مانا مۇشۇ خىل ئۇسۇلدا ئىپادىلىشىدۇ.
 

ئەرلەرمۇ ئۆزلىرىنىڭ چىراي گۈزەللىكىگە ئەھمىيەت بېرەمدۇ؟ (داۋامى كېيىنكى بەتتە)