ئوغۇل بىلەن قىز ئالى مەكتەپتىكى ساۋاقداشلار؛ ئوغۇل چەت جايدىكى يېزىدىن كەلگەن، قىز ئاۋات مەركىزى شەھەردىن كەلگەن؛ ئۇغۇلنىڭ دادىسى ئاددى بىر دىھقان، قىزنىڭ دادىسى بىر شىركەتنىڭ باش دىرىكتورى. بۇ تەرەپلەردىن باشقا، ھېچكىم ئۇلارنى تۇغۇلما بىر جۈپلەردىن ئەمەس دىمەيدۇ. قىزنىڭ ئائىلىسىدىكىلەر قەتئى قارشى چىققان ئەھۋال ئاستىدا، ئىككەيلەن يەنىلا بىرگە بولدى.

     ئوغۇل مۇقىم يۆنىلىشتە تەقسىم قىلىنىدىغان ئوقۇغۇچى بولغاچقا، ئوقۇش پۈتتۈرگەندىن كىيىن، ئەسلىدە بىكىتىلگەن ئورۇنغا قايتىپ خىزمەت قىلىشى كىرەك ئىدى؛ قىز بولسا دادىسى ئالاقىلاشقان ياخشى خىزمەتلەرنى تاشلاپ، ئوغۇل ئىشقا ئورۇنلاشقان ناھىيەگە بىللە كەلدى؛ ئوغۇل ئىدارىدا خىزمەتچى بولۇپ ئىشلىدى، قىز ئوتتۇرا مەكتەپتە مۇئەللىم بولۇپ ئىشلىدى؛ ئىككەيلەننىڭ كۈنى جاپالىق ئەمما خاتىرجەم ئۆتۈۋاتقان بولۇپ، ماددى ئىستەك ئەۋجىگە چىققان ھازىرقىدەك جەمئىيىتىمىزدە، ئۇلارنىڭ بۇ خىل مۇھەببىتى پەقەت ھوللىۋود كىنولىرىدىلا كۆرگىلى بولىدىغان مۇھەببەت ھىكايىلىرىگە ئوخشايتتى.

    مەلۇم بىر كۈنى ھاۋا ئىنتايىن سوغۇق بولۇپ كەتتى؛ قىز ئېغىر زوكامداپ قالغان بەدىنىنى سۆرەپ، مەكتەپتە دەرستە كەينىدە قالغان بالىلارغا، تۇلۇقلاپ دەرس تەكرار قىلىپ بىرىۋاتاتتى؛ قىز ئوغۇلغا تېلفون قىلىپ قويغان بولۇپ، ئۇنىڭ بالدۇرراق ئىشتىن چۈشۈپ تاماق قىلغاچ تۇرۇشىنى تاپىلاپ قويغان ئىدى. ئەمما ئۇ قورساقلىرى ئېچىپ  چارچىغان ھالدا ئۆيگە قايتىپ كەلگەندە، ئوغۇل ئۆيدە يوق بولۇپ، ئۆي ئىچىدىكى ھەممە نەرسە سوغۇق، يېقىندا ئادەم پائالىيەت قىلغاندەك كۆرۈنمەيتتى. قىز ئەمدى ئورنىدىن تۇرۇپ، تاماق قىلىشقا تەمشەلگەندە، ئوغۇل سىرتتىن قايتىپ كەلدى. قىز ئۇنىڭدىن نەگە بارغىنىنى سورىغاندا، ئوغۇل قىز ۋاقتىدا كىلىپ تاماق قىلالمايدىغان بولغانلىقى ئۈچۈن سىرتقا چىقىپ تاماق يەپ كىرگەنلىكىنى ئېيتتى. بۇ گەپنى ئاڭلاپ قىز ئۆزىنى ھەسرەتكە تولغاندەك بىچارە ھىس قىلدى؛ ئۇ كۆزلىرىگە لېققىدە ياش ئالغىنىچە ياتاق ئۆيگە قاراپ ماڭدى؛ ئەمما ئۇ چاي ئۈستىلىنىڭ يېنىدىن ئۆتۈپ كىتىۋاتقىنىدا، يوپكىسىنىڭ بۇرجىكى ئۈستەل ئۈستىدىكى لوڭقىغا تىگىپ كىتپ، لوڭقا يەرگە چۈشۈپ پارە-پارە بۇلۇپ كەتتى. يېرىم يىلدىن كىيىن قىز بۇ ناھىيە بازىرىدىن ئايرىلىپ، ئاۋات مەركىزى شەھەرگە كەتتى.

    مانا بۇ ئەر-خوتۇنلۇق مۇناسىۋىتىدۇر، ناھايىتى قەيسەر كىلىدۇ ھەم ئىنتايىن ئاجىز. ئۇ خۇددى چىرايلىق لوڭقىغا ئوخشايدۇ؛ ئۇنى توغرا بولغان ئورۇنغا قويسىڭىز، يىللارنىڭ سىناقلىرىغا بەرداشلىق بىرىدۇ؛ ئەمما ئۇنىڭغا ئازراقلا تىگىپ قويسىڭىز، يەرگە چۈشۈپ پارە-پارە بولۇپ كىتىشى مۇمكىن.