ھامىلدار ئاياللار، ئەتراپىدىكى ئىلگىرى تۇغۇپ باققان ئاياللاردىن، تۇغۇت جەريانىدا چوقۇم ماغدۇر يېغىپ ساقلاش كېرەكلىكىنى، بۇنىڭدا ئوڭۇشلۇق ھالدا تۇغۇت يولىدىن تۇغۇشقا پايدىلىق بولىدىغانلىقىنى ئاڭلايدۇ؛ لېكىن، تۇغۇت ئالدىدىكى تولغاق سەۋەبىدىن، ھامىلدار ئايالنىڭ قانداق قىلىپ تەمكىنلىكنى ساقلىشى، ئىنتايىن قىيىن بىر مەسىلە بولۇپ قالىدۇ.  ئۇنداقتا، تۇغۇت ئالدىدىكى تولغاقنى پەسەيتىدىغان بىرەر ئۇسۇللار بارمۇ؟ ھامىلدار ئايالنىڭ تولغاق بەك قاتتىق تۇتقانلىق سەۋەبىدىن يۇقىرى ئاۋازد ئىڭىراپ تۇغۇت جەريانىغا تەسىر يەتكۈزۈشىدىن قانداق ساقلىنىش كېرەك؟ تۆۋەندە، تولغاقنى پەسەيتىشنىڭ بىر نەچچە خىل ئۇسۇلىنى تونۇشتۇرۇپ ئۆتىمىز، ھامىلدار ئاياللار بۇ ھەقتە بالدۇرراق چۈشەنچە ھاسىل قىلىپ، ئۆزىگە ماس كېلىدىغان ئۇسۇلنى تاللىسا بولىدۇ.

   توغۇت ئالدىدىكى بالىياتقۇنىڭ يېغىلىپ تارىيىشى سەۋەبلىك كېلىپ چىققان تولغاق ئاغرىقىنى پەسەيتىشكە بولىدۇ، ئاساسلىقى ئوخشاش بولمىغان ئىككى خىل ئۇسۇل ئارقىلىق پەسەيتىشكە بولىدۇ؛ بىر خىلى، دورا ئىشلىتىپ پەسەيتىش، يەنە بىر خىلى بولسا، دورا ئىشلەتمەي پەسەيتىش. بۇنىڭ ئىچىدىكى دورا ئىشلىتىپ پەسەيتىش بولسا، بىز ئادەتتە ئېيتىدىغان تولغاقسىز تۇغۇت بولۇپ، ناركوز دورىسى ياكى ئاغرىق توختىتىش دورىسى ئىشلىتىش ئارقىلىق، ھامىلدار ئايالنىڭ تۇغۇت جەريانىدىكى ئاغرىق تۇيغۇسى پەسەيتىلىدۇ. لېكىن، بۇ خىل دورا ئىشلىتىپ تولغاقنى پەسەيتىش ئۇسۇلى، ھەممىلا ئادەمگە ماس كېلىۋەرمەيدۇ، بۇنىڭدا دوختۇرلارنىڭ كۆرسەتمىسى بويىچە ئىش كۆرۈشكە توغرا كېلىدۇ. بەزى ھامىلدار ئاياللار، دورا ئىشلىتىپ تولغاقنى پەسەيتىشكە ھەقىقەتەن ماس كەلمەيدىغان بولۇپ، بۇ سەۋەبلىك، ئۆزىمىزنىڭ ئەھۋالىنى ئالدىنئالا چۈشىنىپ يىتىش، تۇغۇت ئۇسۇلى ۋە تۇغۇت جەريانىدىكى تولغاقنى پەسەيتىش ئۇسۇللىرى ھەققىدە بەلگىلىك چۈشەنچە ھاسىل قىلىش قاتارلىقلار ئىنتايىن مۇھىم بولۇپ قالىدۇ.

   ئىككىنچى خىل ئۇسۇل بولسا، دورا ئىشلەتمەي تولغاق ئاغرىقىنى پەسەيتىش ئۇسۇلى بولۇپ، بۇ خىل ئۇسۇل بارلىق ھامىلدار ئاياللارنىڭ ھەممىسىگە ماس كېلىدۇ. ئالدى بىلەن، تولغاق تۇتۇشقا باشلىغان تۇغۇش ئالدىدىكى ئاياللارغا نىسبەتەن، كەيپىياتنى ئازادە قويۇپ بىرىش ناھايىتى مۇھىمدۇر؛ چۈنكى جىددىيلەشكەن روھى كەيپىيات، تۇغۇت ئالدىدىكى تولغاق ئاغرىقىنى قاتتىقلاشتۇرۋىتىدۇ. شۇنىڭ ئۈچۈن، ھامىلدار ئايال، باشقىلار بىلەن پاراڭلىشىش، تېلېۋىزور كۆرۈش، مۇزىكا ئاڭلاش قاتارلىق ئارقىلىق، تولغاق ئاغرىقىنى پەسەيتىشكە تىرىشىپ كۆرسە بولىدۇ. ئىككىنچىدىن، نەپەسلىنىشنى تەڭشەش ئارقىلىق تولغاق ئاغرىقىنى پەسەيتىشكە بولىدۇ؛ خۇددى بىز يۈگا ھەرىكىتى ئىشلىگەن ۋاقىتتا، بەزىدە قىيىنلىق دەرىجىسى يۇقىرى بولغان ھەرىكەتلەرنى ئىشلەپ بەدىنىمىزدە ئاغرىق تۇيغۇسى پەيدا بولغاندا، مۇۋاپىق بولغان نەپەسنى تەڭشەش ئۇسۇلى ئارقىلىق ئاغرىق تۇيغۇسىنى پەسەيتكەنگە ئوخشاش، تولغاق ئاغرىقىنىمۇ بۇ ئۇسۇلدا پەسەيتىشنى سىناپ كۆرسەك بولىدۇ. ئۈچىنچىدىن، ھامىلدار ئايالنىڭ ئىرىنىڭ قىلمىشى ۋە پوزىتسىيىسىمۇ ئىنتايىن مۇھىم؛ ئۇلار بۇ ۋاقىتتا ھامىلدار ئايالنىڭ بەل قىسمى ۋە مۈرە قىسمىنى ئۇۋۇلاپ بەرسە ھەمدە بەزىبىر مۇھەببەتلىك سۆزلەرنى ۋە رىغبەتلەندۈرىدىغان سۆزلەرنى قىلىپ بەرسە، تولغاق ئاغرىقىنى پەسەيتىشكە ناھايىتى ياخشى ئۈنۈم كۆرسىتەلەيدۇ.