ھەممە ئاتا-ئانا، ئۆز بالىسىنىڭ كەلگۈسىدە ياراملىق ئادەم بولۇپ چىقىشىنى ئۈمىد قىلىدۇ؛ بولۇپمۇ، ئوغۇل بالىسى بار ئائىلىدە، ئاتا-ئانىسى ئوغلىدىن چوڭ ئۈمىتلەرنى كۈتىدۇ. ئەنئەنىۋى قاراش بويىچە ئېلىپ ئېيتقاندا، ئەرلەر تېخىمۇ كۆپ مەسئۇلىيەتنى ئۆز زىممىسىگە ئېلىشى لازىم بولۇپ، جەمئىيەتنىڭ ئەرلەرگە بولغان تەلىپىمۇ تېخىمۇ كۆپ بولىدۇ. شۇنىڭ ئۈچۈن، ئوغلىنى قانداق تەربىيەلەش، نۇرغۇن ئاتا-ئانىلارنىڭ بېشىنى قاتۇرىدىغان بىر مەسىلە بولۇپ قالغان. ئۇنداقتا، ئوغۇل بالىنى زادى قانداق تەربىيەلىگەندە، ئاندىن ئۇلارنى ياراملىق ئادەم قىلىپ يىتىشتۈرگىلى بولىدۇ؟

1. دادىسى ئوغىلىغا كۆپرەك ھەمرا بولۇپ، ئوغلىغا ئۈلگە بولۇش
    دادا، ئوغۇل بالىسىنىڭ ئۆسۈپ-يىتىلىش جەريانىدا ئىنتايىن مۇھىم رول ئوينايدۇ؛ چۈنكى، دادا بولسا، ئوغۇل بالا بۇ دۇنياغا كۆز ئاچقاندىن كىيىن ئۇچراشقان بىرىنچى ئەر كىشى، شۇڭا ئۇلارنىڭ گەپ-سۆز ۋە ھەرىكەت قىلمىشلىرىغا قارىتا زور تەسىر كۆرسىتىدۇ. نۇرغۇن دادىلار ئۆزىنىڭ مۇھىم رولىنى تۇنۇپ يىتەلمىگەن بولۇپ، ئۇلار ئائىلە تەربىيەسى ئىچىدە كۆپنىچە پەقەت قورقۇتۇش رولىنىلا ئوينايدۇ؛ بىراق بۇنداق ئەھۋال، بالىنىڭ ئۆسۈپ-يىتىلىشىگە قارىتا زىيانلىق تەسىرلا كۆرسىتىدۇ. دادىلار ئادەتتە، "قاتتىق قول دادا" بولۇش بىلەنلا چەكلىنىپ قالماي، بەلكى بالىسىغا كۆپرەك ھەمرا بولۇپ، بالىسىغا ئۈلگە بولۇشى ھەمدە بالىسىنىڭ گەپ-سۆز ۋە ئىش-ھەرىكەتلىرىگە توغرا يىتەكچىلىك قىلىش رولىنى ئوينىشى كىرەك.

2. ئانىلار ئامراقلىقىنى ئازراق ئىپادىلەپ، قول قويۇۋىتىشنى بىلىش
    ئانىلار ئوغۇل بالىسىغا بەكرەك ئامراق كىلىدىغان بولۇپ، ھەمىشە ئۇلارنى ئالقىنىغا ئېلىپ كۆتۈرۈپ ئەركىلىتىدۇ. نۇرغۇن ئانىلار ئوغلىغا ھەددىدىن زىيادە ھەمرا بولۇپ ھەم ئامراقلىقىنى ئىپادىلەپ، بالىسىنىڭ ئازراق جاپا تارتىپ قېلىشىغىمۇ چىدىمايدۇ. بىراق، بۇنداق قىلىشنىڭ بالىنىڭ ئۆسۈپ-يىتىلىشىگە قارىتا ھېچقانداق پايدىسى يوق، ھەتتا بالىنىڭ مىجەز-خۇلقىنىڭ شەكىللىنىشىگە قارىتا سەلبى تەسىر كۆرسىتىشى مۇمكىن. ئانىلار بالىغا بۇنداق زىيادە ئامراقلىق بىلدۈرسە، ئۇلارنىڭ يولسىز، زومىگەر مىجەزىنى شەكىللەندۈرۈپ قويىدۇ. شۇڭا ئانىلار قول قويۇۋىتىشنى ئۆگىنىپ، بالىغا قارىتا زىيادە ئامراقلىقىنى ئىپادىلەپ چىقارماسلىقى كىرەك؛ بۇنىڭ بالىلارنىڭ ئۆسۈپ-يىتىلىشىگە قارىتا بەلگىلىك پايدىسى بولىدۇ.