قارا ئاشلىقنىڭ تەركىبىدە كۆپ مىقداردا سېللىلوزا بولۇپ، سېللىولوزا ئۈچەينىڭ لۆمۈلدەش ھەركىتىنى ئىلگىرى سۈرۈپ، قەۋزىيەت بولۇپ قېلىشنىڭ ئالدىنى ئېلىش رولىنى ئوينايدۇ. بىراق تەركىبىدە كۆپ مىقداردا سېللىلوزا بولغان يېمەكلىكلەرنى زىيادە كۆپ ئىستېمال قىلغاندا، ئەكسىچە سالامەتلىككە زىيان سالىدۇ.

سېللىلوزا ئادەتتە زىيانلىق ماددىلارنىڭ بەدەنگە سۈمۈرلىشىگە توسقۇنلۇق قىلىش بىلەن بىر ۋاقىتتا يېمەكلىك تەركىبىدىكى ئاقسىل، ئانىئورگانىك تۇز ۋە مەلۇم خىل مىكرۇ مىقدارلىق ئېلېمېنت قاتارلىق ئوزۇقلۇق ماددىلارنىڭ بەدەنگە سۈمۈرلىشىگىمۇ تەسىر كۆرسىتىدۇ. مەسىلەن سۇدا پىشۇرۇلغان ياكى قورىغان سېرىق پۇرچاقنى يىگەندە سېرىق پۇرچاق تەركىبىدىكى ئاقسىلنىڭ بەدەنگە سۈمۈرلۈپ ھەزىم قىلىنىش نىسبىتى ئاران %50 ئەتراپىدا بولىدۇ، ئەمما سېرىق پۇرچاقنى پىششىقلاپ پۇرچاق ئۇيۇتمىسىغا ئايلاندۇرغاندا، سېرىق پۇرچاق تەركىبىدىكى سېللىلوزىنىڭ تەركىبى بۇزۇلۇپ كېتىدىغان بولغاچقا، ئاقسىلنىڭ سۈمۈرلۈش نىسبىتى %90 گە يىتىدۇ.

قارا ئاشلىقنى ئاساسىي يېمەكلىك قىلغان يېراق قەدىمقى دەۋىردىكى ئىنسانلارنىڭ ئوتتۇرىچە ئۆمرى ھازىرقى زاماندىكى كىشىلەرنىڭ ئوتتۇرىچە ئۆمرىنىڭ پەقەت تۆتتەن بىرىگە توغرا كەلگەن، ھەتتا ئۇنىڭدىنمۇ كىچىك بولغان. گەرچە بۇ گېن قاتارلىق ئامىللار بىلەن مۇناسىۋەتلىك بولسىمۇ، بىراق يەنە باشقا بىر جەھەتتىن ئويلاشقاندا، ئەينى ۋاقىتتىكى كىشىلەرنىڭ قارا ئاشلىقىنى ئۇزۇن مۇددەت ئىستېمال قىلىشىدىن ئايرىپ قاراشقا بولمايدۇ. چۈنكى قارا ئاشلىقنىڭ ئوزۇقلۇق قىممىتى ئانچە يۇقىرى بولمىغاچقا، ئەينى ۋاقىتتىكى ئىنسانلارنىڭ بەدەن ساپاسىنىڭ تۆۋەن بولىشىدىكى مۇھىم بىر سەۋەب بولۇپ قالغان.

مۇتەخەسىسلەرنىڭ قارىشىچە، كىشىلەر ئەگەر ئۇزۇن مەزگىل يۇقىرى سېللىلوزىلىق يېمەكلىكلەرنى ئىستېمال قىلسا، ئاقسىل، ياغ ۋە مىكرۇ مىقدارلىق ئېلېمېنت قاتارلىق ئوزۇقلۇق ماددىلارنىڭ بەدەنگە سۈمۈرلىشى يېتەرلىك بولماي ياكى كەمچىل بولۇش تۈپەيلىدىن بەدەننىڭ كېسەلگە قارشى تۇرۇش ئىقتىدارى تۆۋەنلەپ كېتىدىكەن.

جۇڭگو ئوزۇقشۇناسلار جەمئىيىنىڭ تەشەببۇسىغا ئاساسلانغاندا، ئەگەر بىر كۈن ئىچىدە ئىستېمال قىلىدىغان ئاساسى يېمەكلىك 400～250 گرام بولسا، بۇنىڭ ئىچىدە قارا ئاشلىق 100～50 گرامغىچە نىسبەتنى ئىگەللىسە مۇۋاپىق بولىدىكەن. ئۇنىڭدىن باشقا، نورمال كىشىلەر قارا ئاشلىقىنى ھەر كۈنى بىر قېتىم ئىستېمال قىلسا ھەم ئىستېمال قىلىش ۋاقتى چۈش مەزگىلىگە توغرا كەلسە ئەڭ مۇۋاپىق بولىدىكەن.