ھەرقانداق ئادەم ئۇزۇن ئۆمۈر كۆرۈشنىڭ غېمىنى قىلىدۇ، بىراق دەردىنى ئىچىگە يۇتۇش، ھەرىكەتكە ئەھمىيەت بەرمەسلىك ۋە بولۇشىغا تويۇنۇپ تاماق يېيىش قاتارلىق ناچار ئادەتلەر تېنىمىزدىكى «ئۇزۇن ئۆمۈر گېنى» نى بىر چىشلەم–بىر چىشلەمدىن يەپ كېتىۋاتىدۇ. ئەمەلىيەتتە، ئۇزۇن ئۆمۈر كۆرۈشنىڭ قېلىپلاشقان قائىدىسى يوق، بىراق ئامېرىكىلىق مۇتەخەسسىسلەر يېقىندا مۇنداق يەتتە خىل ئالاھىدىلىكى بار ئادەمنىڭ ئۇزۇن ئۆمۈر كۆرىدىغانلىقىنى يەكۈنلىدى:

يۈرەك سوقۇشى ئاستا بولىدۇ: تەتقىقات نەتىجىسىدە مۇنداق دېيىلدى: بارلىق سۈت ئەمگۈچى ھايۋانلار مۇنداق بىر قانۇنىيەتكە بويسۇنىدۇ: يۈرەك سوقۇشى قانچە ئاستا بولسا ئۆمۈر شۇنچە ئۇزۇن بولىدۇ. بىر ئادەمنىڭ يۈرىكى ئۇنىڭ بىر پۈتۈن ئۆمرىدە 2 مىليارد 500 مىليون قېتىمدىن 3 مىليارد قېتىمغىچە سوقىدۇ، ئەگەر ئادەمنىڭ يۈرىكى مىنۇتىغا 60 قېتىمدىن سوقۇش سەۋىيەسىنى ساقلىسا، ئۇنداقتا ئۇ ئادەم 93 ياشقىچە ياشايدۇ.

شۇنداق، يۈرەك سوقۇشى قانچە ئاستا بولسا، ئادەمنىڭ ئۆمرى شۇنچە ئۇزۇن بولىدۇ، بىراق يۈرەك سوقۇشى 80دىن يۇقىرى بولغان ئادەمنىڭ ئۆمرى قىسقا بولىدۇ. ئادەتتە ئادەم سەگەك ۋە ھەرىكەت قىلماي تۇرغان چاغدا، يۈرىكىنىڭ سوقۇش قېتىم سانى 60تىن 70 قېتىمغىچە بولسا، ئەڭ مۇۋاپىق بولغان بولىدۇ.

مۇسكۇلى كۈچلۈك بولىدۇ: شىۋېيتسارىيەلىك مۇتەخەسسىسلەر 1 مىليون ئەرنى 27 يىل تەكشۈرگەندىن كېيىن مۇنداق قاراشقا كەلدى: مۇسكۇلى كۈچلۈك ئەرلەرنىڭ ئۆلۈپ كېتىش نىسبىتى باشقا ئەرلەرنىڭكىدىن %20تىن %30كىچە تۆۋەن، روھىي كېسەلگە گىرىپتار بولۇش نىسبىتى %65 تۆۋەن بولىدىكەن. دېمىسىمۇ ئادەمنىڭ مۇسكۇلى كۈچلۈك بولسا، بەدەننىڭ تۈرلۈك ئىقتىدارلىرىنى تېخىمۇ ياخشى ساقلاپ قالغىلى بولىدۇ.

قىلغۇدەك ئىشى بولىدۇ: پېنسىيەگە چىققان نۇرغۇن ئادەم قىلىدىغان ئىش تاپالمىغاچقا، روھىي جەھەتتە چۈشكۈنلىشىپ، بەدەن ساپاسى كۈنسېرى تۆۋەنلەپ كېتىدۇ. مۇتەخەسسىسلەر مۇنداق دېيىشتى: «قولى جىم تۇرىدىغان ئادەمنىڭ ئەستە ساقلاش ئىقتىدارى راستلا ياخشى، دېۋەڭلىك كېسىلىگە گىرىپتار بولۇش خەتىرى تۆۋەن، ئۆمرى تېخىمۇ ئۇزۇن بولىدۇ. چۈنكى ئادەم ئىش قىلغاندا مېڭە ئۈزلۈكسىز غىدىقلىنىپ، نېرۋىلارنىڭ قوغدىلىشى ئىنتايىن ياخشى بولىدۇ».

پىيادە مېڭىش سۈرئىتى تېز بولىدۇ: مۇتەخەسسىسلەر 420 مىڭ ئادەمنىڭ ماتېرىيالىنى يىغىپ ئانالىز قىلغاندىن كېيىن، پىيادە مېڭىش سۈرئىتى ئاستا ئادەمنىڭ يۈرەك كېسىلىگە گىرىپتار بولۇش خەتىرى كۈچلۈك بولىدىغانلىقىنى بايقىدى.

بۇنىڭدىن بۇرۇن ئامېرىكىلىق مۇتەخەسسىسلەر مۇنداق يەكۈنگە ئىگە بولغانىدى: ئادەتتىكى ئادەمنىڭ پىيادە مېڭىش سۈرئىتى 0.9 مېتىر  سېكۇنت بولىدۇ، بىراق بۇ سۈرئەت 0.9 مېتىر  سېكۇنتتىن تۆۋەن كىشىلەر بالدۇر ئۆلۈپ كېتىدۇ، پىيادە مېڭىش سۈرئىتى 0.9 مېتىر  سېكۇنتقا يېتىدىغان ئادەمنىڭ ئۆمرى ئەڭ ئۇزۇن بولىدىكەن. دېمەك، پىيادە مېڭىش سۈرئىتى قانچە ئاستا بولسا، ئادەمنىڭ بەدىنى شۇنچە زىيانغا ئۇچرايدۇ، ھەرىكەتكە چىداملىقىمۇ تۆۋەن بولىدۇ.

تەڭپۇڭلۇق سەزگۈسى ياخشى بولىدۇ: ياۋروپادىكى «يۈرەك كېسىلى ئىلمى» ژۇرنىلى يېقىندا ئېلان قىلغان بىر تەتقىقات دوكلاتىدا مۇنداق دېيىلدى: «تەڭپۇڭلۇق سەزگۈسى تۆۋەن ئادەملەرنىڭ بالدۇر ئۆلۈپ كېتىش خەتىرى ئىنتايىن كۈچلۈك ياشنىڭ چوڭىيىشىغا ئەگىشىپ، ئادەمنىڭ مۇسكۇلى  بوشىشىپ كېتىدۇ، ناۋادا بۇ چاغدا تەڭپۇڭلۇق سەزگۈسى تۆۋەنلەپ كەتسە ئاسانلا يىقىلىپ چۈشىدۇ، بۇ ئەلۋەتتە ئۆمۈرگە تەسىر قىلىدۇ».

ئىنكاسى تېز بولىدۇ: ئەنگلىيەلىك مۇتەخەسسىسلەر يېقىندا ئىنكاسى ئاستا ئادەمنىڭ ئىنكاسى تېز ئادەمگە قارىغاندا بالدۇر ئۆلۈپ كېتىش خەۋپى ئىككى ھەسسە كۈچلۈك بولىدىغانلىقىنى بايقىدى. دېمىسىمۇ ئىنكاسنىڭ سۈرئىتى پاراسەتنىڭ ئۆلچىمى، پاراسەت بولسا ئادەم بەدىنىنىڭ ساغلاملىق ئەھۋالىدىن دېرەك بېرىدىغان مەنبە.

بېلى ئىنچىكە بولىدۇ: ئامېرىكىلىق مۇتەخەسسىسلەر 100 مىڭ پىدائىينى ئىز قوغلاپ تەكشۈرگەندىن كېيىن، مەيلى ئەر ياكى ئايال بولسۇن، بېلى توم ئادەم بېلى ئىنچىكە ئادەمگە قارىغاندا تېخىمۇ بالدۇر ئۆلۈپ كېتىدىغانلىقىنى بايقىدى. مۇتەخەسسىسلەر مۇنداق دېيىشتى: «بېلىنىڭ توملۇقى 89 سانتىمېتىردىن ئېشىپ كەتكەن ئاياللار بېلىنىڭ ئايلانمىسى 71 سانتىمېتىردىن تۆۋەن ئاياللارغا قارىغاندا، تۇيۇقسىز ئۆلۈپ كېتىش ئېھتىماللىقى %79 يۇقىرى بولىدىكەن؛ بېلى زىيادە توم ئەرلەرنىڭ بېلى نورمال ئادەملەرگە قارىغاندا، ‹قان قەنتى يۇقىرى، قان بېسىمى يۇقىرى، قاندا ياغ تەركىبى يۇقىرى› دېگەندەك كېسەللىكلەرگە گىرىپتار بولۇش خەتىرى 2-5 ھەسسە يۇقىرى بولىدىكەن».