بەزىلەر توي قىلىپ بولغۇچە قورساق كۆتۈرۈپ ھامىلدار بولىدۇ؛ يەنە بەزىلەر بولسا بالىسىغا تېخىمۇ ياخشى ئۆسۈپ-يېتىلىش مۇھىتى يارىتىپ بىرىش ئۈچۈن، نەچچە يىل تىرىشىپ ئىشلەپ پۇل تېپىپ ئاندىن قورساق كۆتۈرۈشنى پىلانلايدۇ. لېكىن، قانداق ئەھۋال بولۇشىدىن قەتئىنەزەر، ساغلام بوۋاقتىن بىرنى ئوڭۇشلۇق ھالدا تۇغۇش ئۈچۈن، ھامىلدار بولۇشتىن ئىلگىرى، چوقۇم ئىلمىي ئۇسۇلدا ھامىلدار بولۇشقا تەييارلىق كۆرۈپ، شارائىت يار بەرگەن ئەھۋال ئاستىدا ئەر-خوتۇن ئىككەيلەن ھامىلدارلىق ئالدىدىكى تەكشۈرۈش قىلدۇرۇشى لازىم؛ بۇنىڭدا دوختۇرلارنىڭ كۆرسەتمىسى ئاستىدا، ئۆزىنىڭ تەن ساغلاملىق ئەھۋالىغا قارىتا چۈشەنچە ھاسىل قىلىپلا قالماي، يەنە بىر تەرەپتىن ئەڭ ياخشى ھالەت ئاستىدا قورساق كۆتۈرەلەيدۇ.

كۆپىيىش ئەزاسىدا ياللۇغ بار بولسا
   قورساق كۆتۈرۈشتىن ئىلگىرى، ئەر-خوتۇن ھەر ئىككىسىنىڭ دوختۇرخانىغا بېرىپ تەكشۈرۈش قىلدۇرۇشى تەۋسىيە قىلىنىدۇ؛ ئەگەر ياللۇغلىنىش ئەھۋالى بار بولسا، دوختۇرلار ئادەتتە ياللۇغنى داۋالاپ ساقايتقاندىن كېيىن ئاندىن قورساق كۆتۈرۈش تەكلىۋىنى بىرىدۇ. بۇنداق ئەھۋالدا، چوقۇم دوختۇرنىڭ تەكلىۋى بويىچە ئىش كۆرۈپ ھامىلدار بولۇشقا ئالدىرماسلىق كېرەك؛ بولمىغاندا ھامىلدارلىق مەزگىلىدە خەتەرلىك ئەھۋاللار كېلىپ چىقىشى مۇمكىن.

دورا ئىچىۋاتقان مەزگىلدە ھامىلدار بولۇپ قېلىشتىن ساقلىنىش لازىم
   سالامەتلىكى دېگەندەك ياخشى ئەمەس، ئاسان كېسەل بولۇپ قالىدىغان ئاياللار، دورا ئىچىش مەزگىلىدە، ھامىلدارلىقتىن ساقلىنىش چارىلىرىنى چوقۇم ياخشى ئىشلىشى كېرەك؛ بولۇپمۇ بەزىبىر گورمۇن تۈرىدىكى دورىلار، ھامىيلىگە قارىتا زور دەرىجىدە يامان تەسىر ئېلىپ كىلىدۇ.
   ھامىلدارلىققا تەييارلىق كۆرۈش مەزگىلىدە، ئەر-ئايال ئىككى تەرەپ بەدەن چېنىقتۇرۇش ئارقىلىق بەدەن سۈپىتى ۋە ئىممونت كۈچىنى يۇقىرى كۆتۈرۈشى، مىۋە-كۆكتاتلارنى كۆپرەك ئىستىمال قىلىپ، ھاراق-تاماكىنى تاشلىشى ۋە قانۇنىيەتلىك تۇرمۇش ئادىتى يېتىلدۈرۈشى كېرەك.

   بالىياتقۇ سىرتىدا ھامىلدار بولۇپ قېلىش ياكى بالا ئالدۇرۋىتىشتىن كېيىن قىسقا ۋاقىت ئىچىدە ھامىلدار بولماسلىق
   بالىياتقۇ سىرتىدا ھامىلدار بولۇش، ئادەتتە تۇخۇم توشۇش نەيچىسى راۋان بولماسلىق سەۋەبىدىن بولىدۇ؛ بالىياتقۇ سىرتىدا ھامىلدار بولۇپ قېلىپ داۋالانغاندىن كېيىن، بىر مەزگىل كۈتۈنۈپ ئەسلىگە كەلگەندىن كېيىن ئاندىن ھامىلدار بولماق لازىمدۇر، بولمىغاندا يەنە قايتىدىن بالىياتقۇ سىرتىدا ھامىلدار بولۇپ قېلىش ئېھتىماللىقى ئىنتايىن يۇقىرى بولىدۇ. بالا چۈشۈپ كەتكەن ئەھۋال بار بولسا، سەۋەبىنى تەكشۈرۈپ ئېنىقلىغاندىن باشقا، يەنە تىنچ يېتىپ ئارام ئېلىپ كۈتۈنۈش كېرەك، ئالدىراپ قايتىدىن ھامىلدار بولۇشقا بولمايدۇ.