ئاچچىق ئۆرۈك مېغىزى تەركىبىدە ئادەتتە بىر خىل ئامىگدالىن دەيدىغان ماددا بولىدۇ، ئامىگدالىن ئېغىز بوشلۇقىدىكى شۆلگەي ئېنىزىمىدا ئېرىگەن ۋاقىتتا ئۆتكۈر زەھەرلىك ماددا گىدروسيانىد كىسلاتاسىنى قويۇپ بېرىدۇ. گىدروسيانىد كىسلاتاسى توقۇلما ھۈجەيرىلىرىدىكى تۆمۈر تەركىبلىك نەپەسلىنىش ئېنزىمى بىلەن بىرگە توقۇلما ھۈجەيرىلىرىنى ئوكسىگېندىن پايدىلىنالمايدىغان ھالەتكە كەلتۈرۈپ، كىشىلەردە ئوكسىگېن يېتىشمەسلىك تۈپەيلىدىن زەھەرلىنىشنى كەلتۈرۈپ چىقىرىدۇ. ئادەتتە ئاچچىق ئۆرۈك مېغىزىدىن بالىلار يىگىرمە تال، قۇرامىغا يەتكەن كىشىلەر ئەللىك تال يېگەندە زەھەرلىنىشنى كەلتۈرۈپ چىقىرىدۇ. ئۆرۈك مېغىزىدىن زەھەرلىنىش يۈز بەرگەن ۋاقىتتا ئۆز ۋاقتىدا تەدبىر قوللىنىپ، زەھەرلەنگۈچىنى جىددىي قۇتقۇزۇش كېرەك. زەھەرلەنگۈچى مۇنداق چاغدا بىر ئىستاكان قايناقسۇ ياكى كالا سۈتى ئىچىپ، ئاندىن قول بارمىقى بىلەن كېكىرتەك قىسمىنى غىدىقلىغاندا، سۇ ۋە يېمەكلىك بىرلىكتە قۇسۇپ چىقىرىلىدۇ. ئەگەر زەھەرلىنىش ئەھۋالى بىرقەدەر ئېغىر بولۇپ، نەپەس ئېلىش قىيىنلىشىپ، ھاياتقا خەۋپ يېتىش ئېھتىمالى كۆرۈلسە، دەرھال دوختۇرخانىغا ئاپىرىپ جىددىي قۇتقۇزۇش تەدبىرلىرىنى قوللىنىش كېرەك.

ئاچچىق ئۆرۈك، شاپتۇل، نەشپۈت مېغىزى قاتارلىقلاردىن زەھەرلىنىپ قېلىشنىڭ ئالدىنى ئېلىش ئۈچۈن، ئادەتتە بۇ خىل مېۋە مېغىزلىرىنى كۆپ يېمەسلىك كېرەك، ئەگەر كېسەل داۋالاش ئۈچۈن يېمەكچى بولسا چۇقۇم ئاۋۋال 2-3كۈن بۇرۇن سۇغا چىلاپ قويۇش ھەم بۇ مەزگىلدە سۇنى ئاز بولغاندا 6-8قېتىم ئالماشتۇرۇش، ئاندىن پىشۇرۇپ يېيىش كېرەك.